U zhvillua takimi me drejtuesit e ZVAP-ve dhe përfaqësues të Bashkive të Qarkut Fier.

U zhvillua në sallën e mbledhjeve të Institucionit të Prefektit të Qarkut Fier takimi me drejtuesit e ZVAP-ve të Qarkut Fier dhe përfaqësues të Bashkive të Qarkut Fier, me agjendë: “Mbi fillimin dhe mbarëvajtjen e procesit mësimor për vitin e ri shkollor 2026–2027”.

Takimi u drejtua nga Sekretari i Përgjithshëm, z. Arben Velo, i cili theksoi rëndësinë e bashkëpunimit të ZVAP-ve dhe bashkive të qarkut me Institucionin e Prefektit.

“Fokusi ynë,” – theksoi ai, në emër të Prefektit z. Anduel Xhindi, – “nuk duhet të mbetet vetëm në evidentimin e problematikave, por duhet të shërbejë për të përcaktuar qartë se çfarë duhet bërë, nga kush dhe brenda çfarë afati, me qëllim garantimin e zhvillimit normal të procesit mësimor.”

Gjatë takimit, përfaqësuesit e ZVAP-ve dhe Bashkive diskutuan mbi punën e bërë dhe masat e marra për garantimin e një fillimi sa më të mbarë të vitit të ri shkollor, duke u ndalur veçanërisht në:

• gjendjen e infrastrukturës në institucionet arsimore;
• kushtet e sigurisë në institucionet arsimore;
• regjistrimin e nxënësve në sistemin arsimor parauniversitar;
• sigurimin e transportit të nxënësve;
• shpërndarjen e teksteve falas;
• zbatimin e “Paketës së Sigurisë në Shkolla”;
• zbatimin e programit “Pas Shkolle”.

Takimi shërbeu për të evidentuar problematikat e mbetura, si dhe për të përcaktuar masat konkrete dhe përgjegjësitë përkatëse, me synim garantimin e kushteve të përshtatshme dhe një procesi mësimor sa më normal për të gjithë nxënësit e Qarkut Fier.