Takim i Komitetit Rajonal dhe Tryezës Teknike të Luftës Kundër Trafikimit të Personave

Sot, më datë 24 shtator 2026, në Sallën e Mbledhjeve të Institucionit të Prefektit të Qarkut Fier, u zhvillua takimi i Komitetit Rajonal Antitrafik (KRAT) dhe Tryezës Teknike të Luftës Kundër Trafikimit të Personave.

Fjalën përshëndetëse e mbajti z. Arben Velo, Kryetar i Tryezës Teknike dhe Sekretar i Përgjithshëm i Institucionit të Prefektit të Qarkut Fier. Në fjalën e tij, z. Velo u ndal në kalendarin e veprimtarive të organizuara nga KRAT, duke vënë theksin te rëndësia e bashkëpunimit me Njësitë e Vetëqeverisjes Vendore (NJVV) dhe të gjitha institucionet përgjegjëse, për evidentimin e problematikave, parandalimin e rasteve dhe forcimin e luftës kundër fenomenit të trafikimit të personave.

Në takim morën pjesë përfaqësues nga Ministria e Punëve të Brendshme, Bashkitë e Qarkut Fier, Këshilli i Qarkut, DRAP Fier, DRSHSSH Fier, Spitali Rajonal Fier, ISHPSHSH, si dhe përfaqësues të institucioneve të tjera vendore.

1. Gjergj Prabibaj, përfaqësues i Ministrisë së Punëve të Brendshme dhe Koordinator Kombëtar për Parandalimin dhe Kundërshtimin e Ekstremizmit të Dhunshëm, në fjalën e tij u ndal te risitë e parashikuara në kuadrin ligjor për antitrafikun, ngritja e një sistemi të integruar të të dhënave, si dhe krijimi i një zyre koordinimi.

Ai theksoi se Komitetet Rajonale Antitrafik luajnë një rol të rëndësishëm në evidentimin dhe parandalimin e rasteve të trafikimit, duke nënvizuar rëndësinë e raportimit dhe angazhimit të të gjitha strukturave në nivel vendor. Gjithashtu, ai vuri theksin në nevojën për forcimin e kapaciteteve të KRAT-it dhe organizimin e vazhdueshëm të aktiviteteve sensibilizuese dhe ndërgjegjësuese.

Diskutimet u përqendruan në rëndësinë e koordinimit dhe bashkëpunimit të vazhdueshëm ndërinstitucional, si një nga mekanizmat kryesorë për arritjen e rezultateve të pritshme në parandalimin, identifikimin dhe trajtimin e rasteve të trafikimit të personave.

Takimi shërbeu si një mundësi për forcimin e bashkëpunimit ndërmjet strukturave përgjegjëse dhe për koordinimin e mëtejshëm të veprimeve konkrete në funksion të parandalimit dhe luftës kundër trafikimit të personave në nivel rajonal.