Prefekti i Qarkut Fier, z. Anduel Xhindi,  merr pjesë  në homazhet  në nderim Artistit të Madh, Todi Llupi.

Në nderim të Artistit të Madh, Todi Llupi

Prefekti i Qarkut Fier, z. Anduel Xhindi, së bashku me administratën e Institucionit të Prefektit, morën pjesë në homazhet e zhvilluara në hollin e Teatrit “Bylis”, në nderim të një prej figurave më të shquara të Estradës Profesioniste të Fierit dhe Teatrit “Bylis”, ikonës së humorit shqiptar, Artistit të Madh, Todi Llupi.

Në shenjë respekti dhe mirënjohjeje për jetën dhe veprën e tij artistike, Prefekti i Qarkut Fier vendosi tufa me lule dhe shprehu ngushëllimet më të sinqerta për familjen e të ndjerit, kolegët artistë dhe mbarë qytetarët fierakë, të cilët humbën një nga figurat më të dashura dhe më përfaqësuese të skenës artistike të Fierit.

Todi Llupi do të mbetet përherë në kujtesën e publikut për interpretimet e tij të jashtëzakonshme, humorin e veçantë dhe personazhet e paharrueshme, të cilat sollën në skenë jetën, shpirtin dhe traditat e njerëzve të thjeshtë të Myzeqesë. Me talentin e tij të rrallë, ai la gjurmë të pashlyeshme edhe si parodist, tenor dhe aktor i kinematografisë shqiptare.

Me ndarjen e tij nga jeta, arti shqiptar humbi një prej emrave më të çmuar, kolegët humbën një mik e bashkëpunëtor të vyer, Fieri humbi një qytetar dhe intelektual të respektuar, ndërsa familja humbi njeriun e saj më të dashur.

Todi Llupi do të jetojë gjithmonë në kujtesën e qytetarëve përmes artit, roleve dhe buzëqeshjeve që u dhuroi brezave.

Lamtumirë, Artist i Madh!

U prehsh në paqe!