Takim i Prefekti i Qarkut Fier z. Arben Çuko, me Z. Anar Huseynov, Ambasador i Republikës së Azerbajxhanit.

Prefekti i Qarkut Fier z. Arben Çuko, priti në një takim Z. Anar Huseynov, Ambasadorin aktual të Republikës së Azerbajxhanit në Republikën e Shqipërisë.

Në takim u evidentuan marrëdhëniet miqësore dypalëshe, intensifikimi i bashkëpunimit me qarkun Fier, në kuadër të bashkëpunimit mes dy vendeve, bazuar në besimin dhe respektin e ndërsjellë, sidomos në sektorin e energjisë dhe turizmit.

Prefekti i Qarkut Fier falënderoi Ambasadorin e Republikës së Azerbajxhanit në Republikën e Shqipërisë, për bashkëpunimin në sektorin e energjisë që konsiderohet si një nga fushat më të rëndësishme të marrëdhënieve ekonomike. Përfundimi i gazsjellësit TAP është me rëndësi strategjike- theksoi z. Çuko.

Ambasadori Huseynov e cilësoi qarkun Fier si mjaft të rëndësishëm në ndikimin e tij në ekonomi, duke përfshirë energjinë, turizmin dhe tregtinë. Gazsjellësi Trans-Adriatik (TAP),-tha ai,-është “historia e parë e suksesshme” në bashkëpunimin Azerbajxhan-Shqipëri – një gur themeli për zgjerimin e bashkëpunimit në sigurinë energjetike, turizëm, bujqësi, kulturë dhe investime, ndërsa përmendi lidhjet kulturore, arsimore dhe mediatike, programet e shkëmbimit arsimor dhe mediatik, duke përfshirë partneritetet në nivel universitar në vitet 2023-2024.

Dy qeveritë përkatëse kanë arritur një marrëveshje për të lehtësuar edhe lëvizjen e qytetarëve të të dy vendeve pa viza, gjë që do të rrisë numrin e turistëve, por edhe do të lehtësojë biznesin.