Nis projekti ” Rigjenerimi i Ekosistemit në Pish-Poro “

PROBLEMET MJEDISORE JANË FATURA E PËRGJEGJËSISË SË MUNGUAR TË SHOQËRISË. ÇDO PROBLEM MJEDISOR NIS ME NJERIUN SI SHKAKTAR DHE PËRFUNDON ME NJERIUN SI VIKTIMË.

Në kohën më të shpejtë të mundshme, madje më shpejtë se mund të mendohej me mendësinë e trashëguar nga periudha e tranzicionit tashmë të arshivuar, nisi Plani i Reagimit i AKZM për të zhbërë atë që bënë gjuhët e flakëve në afro dy javë në zonën Pishporo-Darëzezë, Peizazh i Mbrojtur kategoria e V (IUCN).

Nisi sot projekti ” Rigjenerimi i Ekosistemit në Pish-Poro ” nën monitorimin e Agjencisë Kombëtare të Zonave të Mbrojtura, Universitetit Bujqësor të Tiranës, Agjencisë Kombëtare të Pyjeve, PPNEA dhe me pjesëmarrjen e Institucionit të Prefektit të Qarkut Fier, bashkisë Fier, organizatave joqeveritare, komunitetit lokal dhe studentëve të Fakultetit të Shkencave Pyjore.

Projekti nisi me Inspektimin dhe vlerësimin e ekosistemit pas dëmit të shkaktuar nga zjarri, për të vijuar me përcaktimin e operacioneve të ndërhyrjeve rehabilituese, e për ta finalizuar me ekzekutimin në praktikë të aktiviteteve të projektuara, që konsistojnë në pyllëzimin e sipërfaqeve pa shpresë vetë-rikuperimi.