Ngrihet grupi i  punës për monitorimin dhe ndjekjen e emergjencave civile në përballimin e situatës së zjarreve në Q. Fier.

Në Institucionin e Prefektit të Qarkut Fier, nën drejtimin e Prefektit të Qarkut, z. Arben Çuko, dhe me pjesëmarrjen e Këshilltarit të Ministrit të Brendshëm, z. Flamur Mamaj, si dhe të Komisarit të Zjarrfikësve pranë Drejtorisë së Përgjithshme të MZSH-së, z. Agustin Pepkolaj, u zhvillua sot një takim pune në zbatim të urdhrit të Ministrit të Brendshëm nr. 123, datë 29.07.2025, “Për ngritjen e grupit të punës për monitorimin dhe ndjekjen e emergjencave civile në përballimin e situatës së zjarreve”.

Takimi mblodhi drejtues të strukturave të Shërbimit Zjarrfikës, Emergjencave Civile nga gjashtë bashkitë e qarkut, Policisë së Shtetit dhe AdZM Fier, ku u analizuan problematikat dhe masat për përballimin e situatave të shkaktuara nga zjarret.

Prefekti vlerësoi rëndësinë e angazhimit të të gjitha kapaciteteve njerëzore dhe logjistike për parandalimin e rrezikut nga zjarret gjatë sezonit veror, duke shprehur mirënjohje dhe falënderim për të gjitha forcat që janë angazhuar në menaxhimin e këtyre situatave.

Më pas, takimi vijoi me diskutimet e të pranishmëve mbi problematikat e konstatuara gjatë menaxhimit të rasteve të zjarreve.