MEHMETAJ – MBIEMRI QË U BË SINONIM I BLETËRRITËSIT .

Një vizitë në parkun e bletëve të familjes Mehmetaj në Cakran, për tu kthyer ngarkuar me propolisin shumëngjyrësh të disa ndjesive .

Një mikpritje e ëmbël mjaltë, në hyrje të parkut, nga djaloshi 29 -vjeçar Gert Mehmetaj .

I ri në moshë e në dukje, por i vjetër në profesion .

Gerti ndërsa të tregon për moshën 29 vjeçare, detajon se ka 20 vjet si bletërritës .

Përveçse si aktivitet ekonomik fitimprurës, Gerti e shikon mbarështimin e bletëve edhe si një premtim për të ruajtur trashëgiminë e të atit, Jetnorit, i cili bëri që mbiemri Mehmetaj të kthehej në sinonimin e bletarit .

Djaloshi bletar sqaron, se njohuritë profesionale të trashëguara e të fituara i mundësojnë prezencën në treg me disa produkte si mjalti , uthulla e mjaltit dhe qumështi i bletës, që konsiderohet si lëngu çudibërës .

“Çdo koshere blete; -thotë djaloshi;- është një fabrikë ilaçesh bimore.”

Gerti të bën përshtypje për optimizmin me të cilin e shikon të ardhmen e sektorit të bletarisë dhe të bujqësisë në përgjithësi , duke shërbyer si shembull i suksesit për të rinjtë .

“Sektori i bujqësisë; -thotë ai;- nuk është sektori i përfitimit të shpejtë, por i pasurimit dinjitoz .”